Mer chönne (fasch) aues, wome us Houz cha härschtöue und send Houzprofis, wenns om energetischi Sanierige goht. Mer send bereit, Ihne es Komplett-Rondom-Bou-Paket chönne aaz'biete damet eri Legeschaft förd Zuekonft gwappnet isch. Bi öis chame aber ou eifach verbii cho, weme e Bauke bruucht oder aalüte weme Fänschder sött rechte ond iischdöue.

Das was mer us Houz erschaffe, produziere mer no säuber, i de hötige Zyt e absolute Vortöu. Zom eine entscheidet de Chond, was förne Schdiiu ehm gfaut ond mer setze sini Wönsch för ehn ond öis gwönnbrengend om.

Zom andere chönne mer die ökologische, energetische ond wirtschaftleche Aschpäkt ufzeige ond uusrächne. Zudäm legge mer set jeehär Wärt ufene Top Qwalidät, das foht bi de Planig aa ond hört bim Ändprodukt uf.

Vöu Nou-Hau rond oms Boue met Houz. Mer send flexibu, onabhängig ond händ e super Mannschaft.

Höt muess möglechschd aues nochhautig ond ökologisch sii – tja, das faut öis nid schwär. Mer schaffe scho met em beschde natürleche Bouschtoff, em Houz, säubschdverschdänlech luege mer vo de Beschaffig bes Entsorgig ufd Omwäut, met de eigete Fotovoltaikaalag produziere mer tagsöber Solarschtroom, dä bruche mer ou grad för die kompletti Produkzion, tanke demit no öisi E-Flotte ond schpiise de Räschde is Netz för aui ii. Em Wenter heize mer set jehär met de aagfallne Houzabfäu öisi Wärchschdatt ond Büros ond mer resaikle das womer chönne. Ou schtöhmer förnes guets Betrebsklima, wo jede sech cha wiiterböude, d'Lehrlinge e gueti Uusböudig bechöme ond jede so cha sii, wiener isch.